حاجات ما تعرفيهاش عن نفسك – تركيب البشرة

استني!!!!!

قبل ما تغسلي بشرتك

قبل ما تستخدمي أي مستحضر على بشرتك

قبل ما تحطي الميك أب بتاعك

قبل كل ده لازم تتعرفي الأول على بشرتك

وأنا أحب أعرفكم ببعض، ياللا بينا

تعرفي إن الجلد ده أكبر عضو في جسم الإنسان ومساحته تقريبا 18580cm2، وليه وظايف كتيرة من أهمها:

1. حماية جسم الانسان: تخيلي كدة ان مافيش جلد هتلاقي إن جسمنا من جوة عرضه للميكروبات وظروف الجو وآشعة الشمس بشكل مباشر ومؤذي

2. الإحساس: لأن سطحه مليان نهايات عصبية كتيرة تساعك على التعرف على ملمس الأشياء وحراراتها، عشان كدة أي شكة ابرة أو قرصة ناموسة أو لسعة حاجة سخنة بتوجع أوي

3. تخليص الجسم من المواد الضارة: عن طريق افراز العرق (يعني العرق ده مش حاجة وحشة أو مشكلة في جسمي لكننا هانعرف بعدين نتعامل معاه إزاي)

3. تنظيم درجة حرارة الجسم: لأنه في بيقدر يتحكم في كمية العرق ومكوناته، ويستخدمها في تلطيف درجة حرارة الجسم

الجلد مهما اختلف نوعه أو حالته، بيتكوّن من 3 طبقات

1. الطبقة الخارجية اسمها Epidermis

2. الطبقة اللي في النص اسمها Dermis

3. الطبقة اللي جوة خالص Hypodermis

إيه بقى حكايتهم دول؟

1. طبقة Epidermis:

دي طبقة سمكها 0.05mm بتتكون من طبقات رقيقة جدا من نوع معين من الخلايا، والخلايا دي مش بيوصلها أي وعاء دموي لكنها بتتنفس الأكسجين اللي في الهواء (عشان كدة تهوية بشرتي شيء مهم جدا واستخدام أي حاجة بتمنع وصول الهوا ليها بيأذي البشرة جدا). كمان الطبقة فيها خلايا صبغية وهي اللي بتدي البشرة لونها المختلف من واحد للتاني.

2. طبقة Dermis:

سمكها 1-4 mm ودي الطبقة اللي بتتحدد فيها بصمتنا، وبتكون مليانة بالأوعية الدموية وغدد العرق والغدد الدهنية وبصيلات الشعر. والطبقة دي غنية بنسب كبيرة من بروتينات الكولاجين والإيلاستين اللي بيخلوا البشرة نضرة ومرنة. لما بتعملي (تاتو) الحبر بتاعه بيكون في الطبقة دي. وعلامات التمدد بعد الولادة او الريجيم بتظهر كمان في الطبقة دي.

3. طبقة Hypodermis:

سمك الطبقة دي بيتراوح في الإناث بين 3.5 – 25 mm، والفرق الكبير ده راجع إن إنها بتتكون من دهون بنسبة عالية وفي كل منطقة في الجسم نسبة دهون مختلفة. الدهون دي مهمة جدا في تدفئة الجسد وحمايته من برودة الجو إلى جانب إنها بتربط مكونات الجلد بالعضلات والعضم اللي تحتها – الطبقة دي اللي بيتاخد فيها الحقن تحت الجلد

باقي لك إنك تعرفي إن تركيب الجلد بيختلف من مكان لمكان في بعض الصفات فمثلا تحت العين غير الكعب وتحت الإبط غير راحة اليد

وخلصت الحدوتة

لو عندك أي سؤال اكتبيه في الكومنتات وها نرد عليكي في أقرب فرصة

لو عايزة تعرفي عن موضوع معين اكتبي لنا في الكومنتات

لو استفدتي وحاسة إن الموضوع ده هايفيد ناس تانية تعرفيهم اعملي share وخلي اهتمامك بيهم يوصل لهم

#Vitatreat