حاجات ما تعرفيهاش عن نفسك – أنواع البشرة

كنا اتكلمنا قبل كدة عن بشرتك ومكوناتها في التدوينة دي

حاجات ما تعرفيهاش عن نفسك – تركيب البشرة

وبعد ما عرفتي بشرتك بتتكون من إيه، تعالي دلوقتي نتعرف مع بعض على أنواع البشرة المختلفة وإزاي تعرفي نوع بشرتك.

يمكن فيه تقسيمات كتير لأنواع البشرة، ولكن التقسيم المنتشر أكتر والعملي أفضل هو تقسيم البشرة لأنواع حسب كمية الافرازات الدهنية اللي بتنتجها الغدد الدهنية في طبقة Dermis. الغدد الدهنية دي ربنا خالقها لتغذية طبقات الجلد اللي بتنمو وبتبعد عن طبقة Dermis عشان تفضل نضرة وطرية وناعمة. عند البعض بتكون كمية الافرازات متوازنة فبتخلي البشرة (عادية) وعند البعض الآخر بتكون قليلة وبالتالي تخلي البشرة (جافة) أو كتيرة فتخلي البشرة (دهنية). وهم دول الـ3 أنواع المعروفين (عادية – جافة – دهنية)؛ وفيه كمان نوع رابع بيسموه (مختلطة) وده اللي بيكون فيه مناطق من البشرة جافة ومناطق تانية دهنية.

النوع الأول: البشرة العادية:

ودي بنعتبرها النوع المثالي والطبيعي للبشرة، بتكون كمية الإفرازات الدهنية مش أكتر من اللازم فتحسي بشرتك مزيتة ولا أقل من المطلوب فتحسيها ناشفة وخشنة. ومن صفات النوع ده كل الصفات اللي نفسك تكون بشرتك عليها:

- ناعمة ونضرة ومشرقة

- مسامها ضيقة وغير مرئية

- قليلة التحسس

- خالية من البقع

النوع الثاني: البشرة الدهنية:

النوع ده بيزهق صاحبته حبتين، وبيديها إحساس إن بشرتها مزيتة خاصة في الصيف. وطبعا ده لأن كمية الإفرازات الدهنية أكثر من اللازم لترطيب البشرة وبالتالي بتلاحظي عليها الصفات دي:

- مسام واسعة وواضحة

- بشرة سميكة ولامعة

- حبوب وبقع

- رؤوس سوداء

النوع الثالث: البشرة الجافة:

والنوع ده عكس البشرة الدهنية تماما؛ لأنها بتعاني من نقص في الافرازات الدهنية، فتحسيها مشدودة وخصوصا بعد الاستحمام وكمان هتلاقيها مميزة بالصفات دي:

- مسام ضيقة

- خشونة وتشققات

- وحكة وشحوب

- خطوط وتجاعيد

- بقع حمراء

النوع الرابع: البشرة المختلطة:

ومن اسمه واضح إنه خليط ما بين نوعين البشرة الجافة والدهنية، وفي الغالب بتكون منطقة T-zone (اللي هي منقطة الجبهة والأنف والدقن) دهنية أما الخدود فبتبقى جافة. والنوع ده متعب شوية في العناية بيه.

طيب السؤال المنطقي اللي ييجي على بالك هنا، إزاي أعرف نوع بشرتي؟ تعالي أقول لك . .

1. اغسلي وشك بغسول لطيف

2. نشفي وشك بفوطة ناشفة بالضغط الخفيف بدون دعك

3. اتركي بشرتك ساعتين

4. لاحظي ملمس وحالة وشكل بشرتك

لو كانت بشرتك جافة، هاتحسيها بقت خشنة ومشدودة في وقت قريب جدا بعد التنشيف

بس لو كانت بشرتك دهنية، هتلاقيها مزيتة لدرجة انك ممكن تلاقي نقط زيت صغيرة جدا خارجة من المسام وتبان لما تمسحيها بالمنديل

ولو لاقيتيها مشدودة من الخدود ومزيتة في T-zone، تبقى بشرتك من النوع المختلط

أما لو كانت بشرتك صافية ومافيهاش اي احساس بالخشونة ولا بالتزييت، فمبروك عليكي بشرتك عادية

صحيح كل واحد ليه نوع بشرته اللي اتولد بيها، لكن خدي بالك إن فيه تغييرات بتحصل لجسمك فبتأثر على بشرتك، فمثلا في فترة المراهقة الجلد بيميل إنه يكون دهني أكتر من فترة الطفولة، وده بتأثير الهرمونات في المرحلة العمرية دي. ومن العوامل اللي بتأثر على كمية الافرازات الدهنية وبالتالي بتغير نوع الجلد بشكل مؤقت:

- الحمل

- الدورة الشهرية

- الشيخوخة

- التعرض للملوثات

- تغير الظروف الجوية

- عدم استقرار الحالة النفسية

وطبعا كل نوع بشرة وليه الطرق المناسبة للاهتمام بيه رعايته أفضل رعاية، بس دي نخليها في مرة تانية

لو عندك أي سؤال اكتبيه في الكومنتات وها نرد عليكي في أقرب فرصة

لو عايزة تعرفي عن موضوع معين اكتبي لنا في الكومنتات

لو استفدتي وحاسة إن الموضوع ده هايفيد ناس تانية تعرفيهم اعملي share وخلي اهتمامك بيهم يوصل لهم

#Vitatreat