ليه تعرفي أكتر؟

بعد ما بدأت أكتب للناس عن البشرة والشعر، بدأت تيجي لي أسئلة كتيرة في مواضيع كتيرة

سواء استفسارات عن مستحضرات تجميل أو طلب معلومة طبية معينة أو غيره

لكن أكتر سؤال وصلني واستفزني الأول بصراحة، لكن بعد كدة حسيت إنه سؤال منطقي جدا:

"هو أنا ليه أعرف أكتر عن بشرتي وشعري؟"

الأول قبل ما أجاوب على السؤال المنطقي ده، خلينا نتفق على نقطة محورية وهي إن (المعرفة قوة) سواء على المستوى الفردي أو الجماعي

يعني لو بصيتي معايا للدول، هتلاقي إنها بتتنافس في نقطتين مهمين جدا:

1. المخابرات

2. البحث العلمي

والنقطتين دول قايمين على المعرفة، يعني البلد اللي عندها معلومة مخابراتية أكتر وقبل الباقي بيبقى ليها التقدم. كمان البلد اللي بتهتم في ميزانيتها بالبحث العلمي، بتقدر تكون غنية وليها سلطة أعلى.

خلينا ناخد كمان مثال على المستوى الفردي، لما بييجي عيد ميلاد حد نعرفه. أكتر ناس بتعرف تجيب هدايا مناسبة بجد للشخص ده، هم الناس اللي عارفينه أكتر، عارفين بيحب إيه ومش بيحب إيه، عنده إيه وماعندوش إيه.

مجرد مثالين صغيرين قربوا لنا الصورة خالص وأكدوا لنا إن (المعرفة قوة)

وبالتالي، حضرتك لما تعرفي أكتر عن شعرك وبشرتك بشكل أكثر عمقا، هاتقدري تفهميهم أكتر، فتقدري تعرفي تتعاملي معاهم إزاي، وتقدري تحددي إيه المناسب ليهم وإيه اللي ممكن تجنبيه في التعامل معاهم. وكل ده هايتترجم بشكل مباشر في مدى جمال مظهرك قدام الكل، لإن شعرك وبشرتك هم عنوانك. أكيد كدة فهمتيني وعرفتي إن (المعرفة = جمالك)

لكن للأسف، لأن فيه ناس كتير بتسترزق من ورا الإنترنت، بقى فيه كمية أفكار ومعلومات غلط محطوطة على الأنترنت لأسباب كتيرة منها:

1. ناس بتبحث عن اللايك والشير والترافيك، فبيحط لِك على مواقع التواصل الاجتماعي أي معلومة صادمة حتى لو غلط عشان تبدأي تنبهري وتصدقي وتعملي لايك وشير وخلاص

2. ناس مهتمة بتسويق منتج تجميلي معين، فيبدأ يستخدم معلومة صح بس مش كاملة، او معلومة غير صحيحة عشان يروّج لمنتجه، وطبعا أنت الضحية

3. ناس مش دارسة ولكنها حابة تبان مثقفة، فبتاخد نص معلومة صح من هنا على ربع معلومة غلط من هناك، لأن مش عندها المصادر الحقيقية المعتمدة الصحيحة

عشان كل الأسباب دي، لازم تبقي متأكدة إن المعلومة اللي هاتعتمدي عليها، لازم تكون من مصدر فعلا موثوق فيه

ومن هنا بدأت فكرة المدونة دي، مكان مخصوص ليكي، معمول عشانك وعشان كل واحدة بتشتغل. المكان ده كل همه في الحياة إنك تعرفي أكتر، فتبقي حرة أكتر. حرة في قراراتك، حرة في اختياراتك، حرة في حياتك، حرة في طريقتك. عشان كدة هتلاقي في المدونة مواضيع كمان تساعدك في شغلك، زي إدارة الوقت والعمل الجماعي ومهارات تانية كتيرة

(المعرفة = حرية)

حابب كمان إنك تبقى عارفة أن كل حاجة إنت بتشوفيها هنا في المدونة مدروسة ومتراجعة من مصادر علمية فعلا، ولكن بنراعي دايما معايير معينة في كل اللي بنقدمه:

1. سهولة الصياغة: إنه يكون سهل في طريقة كتابته، عشان كدة اختارنا نكتب بالطريقة اللي بنتكلم بيها

2. بساطة المعلومة: إننا مش بنجيب تفاصيل التفاصيل التفاصيل، فالموضوع يبقى معقد بالنسبة لك، لأن مش ده اللي هايفيدك عمليا. بنحب نركز أكتر على الجزء اللي هايفيدك

3. التركيز والتدرج: بمعنى إن كل مقالة هتلاقيها بتتكلم في نقطة معينة بدون تشعب كتير، عشان ماتخرجيش منها تايهة ولكن فاكرة ايه اللي عرفتيه جديد

تيجي واحدة تقول: طيب ما أنا أشوف صحباتي بيعملوا إيه وأعمل زيهم وخلاص، من غير ما أعرف أكتر!

أحب أسألك سؤال: من قال لك إنك زي صحباتك؟ مين قال لك إن اللي ينفعهم ينفعك؟ أنت مميزة

اوعي تنسي . . .

المعرفة = قوة

المعرفة = حرية

المعرفة = جمالك

وخلصت الحدوتة

لو عندك أي سؤال اكتبيه في الكومنتات وها نرد عليكي في أقرب فرصة

لو عايزة تعرفي عن موضوع معين اكتبي لنا في الكومنتات

لو استفدتي وحاسة إن الموضوع ده هايفيد ناس تانية تعرفيهم اعملي share وخلي اهتمامك بيهم يوصل لهم

#Vitatreat