حاجات ما تعرفيهاش عن نفسك – أنواع الشعر

كنا اتكلمنا قبل كدة عن شعرك ومكوناته في التدوينة دي

حاجات ما تعرفيهاش عن نفسك – تركيب الشعر

وبعد ما عرفتي شعرك بيتكون من إيه، تعالي دلوقتي نتعرف مع بعض على أنواع الشعر المختلفة وإزاي تعرفي نوع شعرك.

يمكن فيه تقسيمات كتير لأنواع الشعر، ولكن التقسيم المنتشر أكتر والعملي أفضل هو تقسيم الشعر لأنواع حسب كمية الافرازات الدهنية اللي بتنتجها الغدد الدهنية فؤوة الرأس. الغدد الدهنية دي ربنا خالقها لتغذية الشعرة اللي بتنمو من البصيلة عشان تفضل ناعمة ولامعة وقوية وطويلة. عند البعض بتكون كمية الافرازات متوازنة فبتخلي الشعر (عادي) وعند البعض الآخر بتكون قليلة وبالتالي تخلي الشعر (جاف) أو كتيرة فتخلي الشعر (دهني). وهم دول الـ3 أنواع المعروفين (عادي – جاف – دهني)؛ وفيه كمان نوع رابع بيسموه (مختلط) وده اللي بيكون فيه أطراف الشعرة جافة وجسم الشعرة دهنية.

النوع الأول: الشعر الدهني:

النوع ده مهما كان نوع الشامبو اللي بتستخدميه، ما يستحملش تسبيه يومين من غير غسيل، وطبعا ده لأن كمية الإفرازات الدهنية اللي في فروة الراس أكثر من المطلوب وبالتالي بتلاحظي علي شعرك الصفات دي:

- ملزق وباهت

- هبطان على فروة الرأس

- نسبة قشرة الرأس عالية

النوع الثاني: الشعر الجاف:

والنوع ده عكس الشعر الدهني تماما؛ لأنه بيعاني من نقص في الافرازات الدهنية من فروة الرأس، وده بقى بمجرد ما يتعرض للحرارة أو للشمس تلاقيه اتشد ونشف، وكمان هتلاقيه مميز بالصفات دي:

- ناشف وخشن وهايش

- مطفي ولونه معفر

- أطرافه متقصفة

- نسبة تساقطه عالية

النوع الثالث: الشعر العادي:

أحب أهنيكي لو شعرك من النوع العادي، رغم إن الكلمة عادي توحي إنه كل الناس كدة وده شيء عادي، لكن في الواقع نسبة الناس اللي شعرهم من النوع العادي قليلة جدا. وهم محظوظين لأن كمية الإفرازات الطبيعية اللي بتخرج من فروة الرأس متوازنة لا هي قليلة فالشعر يبقى جاف ولا هي كتيرة فالشعر يبقى ذهني. عشان كدة من صفات النوع ده:

- ناعم ولامع

- قوي وصحي

- معدل تساقط قليل جدا

- خالي تقريبا من القشرة

- نسبة تقصف أطرافه قليلة جدا

النوع الرابع: الشعر المختلط:

ومن اسمه واضح إنه خليط ما بين نوعين الشعر الجاف والدهني، فبتكون جذوره والأجزاء القريبة من فروة الرأس دهنية أما الأطراف فبتبقى جافة ومتقصفة. والنوع ده متعب شوية في العناية بيه.

طيب السؤال المنطقي اللي ييجي على بالك هنا، إزاي أعرف نوع شعري؟ تعالي أقول لك . .

1. اغسلي شعرك بالشامبو

2. نشفي شعرك بفوطة ناشفة بالضغط الخفيف بدون دعك

3. سيبي شعرك ينشف طول الليل

4. امسحي بمنديل ورق على شعرك

لو شعرك عادي، هايطلع بقع زيت صغيرة في المنديل

لو شعرك دهني، هاتلاحظي إن المنديل بقى بيلزق في الشعر والشعر لازق في نفسه

لو شعرك جاف، مش ها يطلع بقع زيت لكن ممكن تظهر نقط سوداء صغيرة

صحيح كل واحد ليه نوع شعره اللي اتولد بيه، لكن خدي بالك إن فيه تغييرات بتحصل لجسمك فبتأثر على شعرك، ومن العوامل اللي بتأثر على كمية الافرازات الدهنية وبالتالي بتغير نوع الشعر بشكل مؤقت:

- النظام الغذائي

- مستحضرات العناية بالشعر

- مكواة الشعر والسشوار

- التعرض للملوثات

- تغير الظروف الجوية

- عدم استقرار الحالة النفسية

- تغير مستوى الهرمونات في الجسم

وطبعا كل نوع شعر وليه الطرق المناسبة للاهتمام بيه رعايته أفضل رعاية، بس دي نخليها في مرة تانية

لو عندك أي سؤال اكتبيه في الكومنتات وها نرد عليكي في أقرب فرصة

لو عايزة تعرفي عن موضوع معين اكتبي لنا في الكومنتات

لو استفدتي وحاسة إن الموضوع ده هايفيد ناس تانية تعرفيهم اعملي share وخلي اهتمامك بيهم يوصل لهم

#Vitatreat