حاجات ما تعرفيهاش عن نفسك - تركيب الشعر

قال نزار قباني:

"أوصيت الريح أن تُمشّط خصلات شعرك الفاحم . . فأعتذرت، بأن وقتها قصير وشعرك طويل"

وقال أيضا:

"لا تُمشّطي شعرك على مقربة مني . . حتى لا يُهَرهِر الليل على ثيابي"

مش بس نزار، دول كتير . . أتكلموا عن الشَعر، وغنوا عن الشَعر، وحبوا شَعرهم، وأولهم أنت لكن يا ترى أنت تعرفي شَعرك بجد؟ عارفة بيتكون من إيه؟ عارفة إيه فوايده غير إنه تاج ليكي؟ طيب ما تيجي نشوف! الشعر بطبيعته جزء من تركيب الجلد زي ما اتكلمنا هنا: حاجات ما تعرفيهاش عن نفسك – تركيب البشرة

لكن لأهميته واختلاف تركيبه وطرق التعامل معاه بنتكلم عليه بشكل منفصل للشَعر وظايف كتيرة: 1. المنظر الجميل: زي شعر الرأس والحواجب 2. التدفئة: زي شعر الجسم 3. الحماية: زي الرموش 4. الإحساس: لأن تحريك الشعر بيحفز خلايا عصبية حسية في الجلد وأكبر غلطة ممكن نعملها واحنا بنتعرف على الشعر، هي إننا نتعامل معاه على إنه هو خيط رفيع ملون وخلاص وده لأن الشعر شبه الشجرة، صحيح اللي باين منها الجذع والفروع والورق والثمار، لكن كل ده معتمد على نظام قوي من الجذور . . فخلينا نبدأ مع بعض نتعرف على شعرنا صح

يبدأ نمو الشعرة من بصيلة الشعر الموجودة في طبقة Dermis من الجلد والبصيلة دي ببساطة مجموعة من الخلايا اللي بتبدأ تكوّن ألياف الكيراتين اللي بتكوّن الشعر والخلايا دي محاطة بشعيرات دموية عشان توصّل الغذاء المطلوب لنمو الشعرة وثباتها مع استمرار النمو، تخترق الشعرة طبقة Epidermis في الجلد، وتأخذ في النمو طولا فيه حاجتين كمان مهمين مرتبطين ببصيلة الشعر في طبقة Dermis 1. عضلة بتنقبض فتوقف الشعرة في مواقف الاحساس بالفزع والبرودة كوسيلة حماية 2. غدد دهنية بتفرز مادة زيتية لتغذية الشعر ولإكسابها اللمعان الطبيعي والناس اللي بتضطر تاخد علاج كيماوي أو اشعاعي؛ شعرهم بيقع لأن العلاج ده بيوقف عمل خلايا البصيلة اللي بتنبت الشعر، لكن ده بيكون بشكل مؤقت وبيرجع تاني بعد فترة من انتهاء العلاج ولو حبينا نفهم شعرنا بشكل أعمق، خلينا نتخيل سوا إننا أخدنا شعرة قصيناها، وبصينا على مكان القص ده تحت الميكروسكوب هنلاقي 3 مساحات دائرية الشكل (ارجعي للرسم) 1. اللي في المركز اسمها Medulla: ودي مش بتكون موجودة في شعر الرأس 2. المساحة اللي بعدها اسمها Cortex: هي المساحة الأكبر من مقطع الشعرة، نقدر نعتبره هو ده جسم الشعرة اللي فيه البروتينات والألياف والصبغة اللي بيكوّنوا الشعرة 3. والمساحة اللي في الخارج اسمها Cuticle: وهي طبقة رقيقة جدا جدا جدا وظيفتها إنها تحمي Cortex من العوامل الخارجية المؤذية. وتهتك Cuticle بيبدأ مشكلة تقصف الشعر وخلصت الحدوتة لو عندك أي سؤال اكتبيه في الكومنتات وها نرد عليكي في أقرب فرصة لو عايزة تعرفي عن موضوع معين اكتبي لنا في الكومنتات لو استفدتي وحاسة إن الموضوع ده هايفيد ناس تانية تعرفيهم اعملي share وخلي اهتمامك بيهم يوصل لهم #Vitatreat