خلي سيرتك حلوة

كان ياما كان، فيه شاب اتخرج وراح يقدم في شغلانة فرفضوه، راح يقدم في شغلانة تانية فرفضوه برضه، وفضل على كدة كتير كل ما يروح يقدم في شغلانة يرفضوه. بعد فترة اكتأب جدا وأمه أخدت بالها ولما فهمت منه السبب طمنته.

ودخلت أوضتها وقفلت على نفسها ومسكت قلم وورقة . . وبدأت تكتب جوابات لمدراء الشركات اللي راح لهم ابنها، في الجوابات دي بدأت تتكلم عن مزايا ابنها المفيدة للعمل وللشركات دي وقد إيه هو بارع في نقط معينة تزود ارباح الشركات دي. وكانت الجوابات دي مؤثرة جدا لدرجة إن ابنها جاله من الشركات دي كذا عرض عمل واتوظف في واحدة منهم بالفعل.

بعد فترة صغيرة، بدأت تساعد كذا شاب بنفس الطريقة إنهم يتوظفوا في شركات كانت بتقعد مع كل واحد تفهم منه طبيعة الشركة وإيه هي مميزاته الشخصية وخبرته. وتبدأ هي تنظم البيانات دي تبين للمدير قد إيه الشاب المتقدم للوظيفة دي هاينفع الشركة جدا.

ومن هنا بدأت قصة السيرة الذاتية.

إيه هي السيرة الذاتية؟:

أنا هنا مش عايز أتكلم عن تعريف أكاديمي لمعنى السيرة الذاتية لكن خلينا نتكلم كلام سهل ومبسط

تسمى السيرة الذاتية بالـ CV وهي الحروف الأولى للكلمة اللاتينية Curriculum Vitae ومعناها منهج الحياة. لكن اللي يهمنا هنا هو نظرتنا للسيرة الذاتية

السيرة الذاتية هي الورقة اللي بتتكلم عنك وبتخلي المدير أو صاحب العمل يبدأ يفكر إنك ممكن تكوني الشخص المناسب للوظيفة دي . . عشان كدة مهم جدا تأخدي بالك من حاجتين:

1. لازم تخلي السيرة الذاتية بتتكلم مكانك فعلا، يعني تقدري تعتبريها فرصة تقدمي نفسك بحرفية فيها، فبياناتها لازم تكون صادقة طبعا وواضحة ومهدفة

2. مافيش حاجة اسمها تعملي CV وتاخدي منه كذا نسخة وتبعتيها للشركات، لازم تقدمي في كل نسخة شيء مختلف وهو الشيء اللي فيكي واللي الشركة دي بتدور عليه في هذا المنصب الوظيفي . . صحيح فيه أجزاء في السيرة الذاتية مش بتتغير زي بياناتك الشخصية وشهاداتك لكن فيه أجزاء تانية لازم تتعبي شوية في تقديمها بذكاء عشان تفوزي بالوظيفة دي.

إزاي تكتبي سيرتك الذاتية؟:

الخطوة الأولى: في البداية هي القراءة عن الشركة وعن منتجاتها ووضعها في السوق وعن الوظيفة اللي هاتتقدميلها وممكن كمان تعرفي عن مدراءها وموظفيها من linkedin مثلا، وجمعي كل البيانات دي عندك

الخطوة التانية: فكري إيه اللي الشركة محتاجاه وبتدور عليه في الموظف اللي هايشغل المنصب ده، وكمان إيه المزايا والعيوب اللي فيكي ممكن تكون مناسبة للوظيفة دي – وأيوة أنت قريتيها صح هي العيوب فممكن تكون الدقة الشديدة حاجة بتزهق اللي حواليكي منك مثلا لكنها صفة مفيدة جدا في شغل الحسابات

الخطوة التالتة: هاتبدأي تكتبي سيرتك الذاتية بالترتيب التالي:

1. البيانات الشخصية:

خلي البيانات دي واضحة وقصيرة بدون تطويل

- الاسم: (رباعي)

- تاريخ الميلاد: (بالأرقام)

- التليفون: (اتأكدي إن الرقم اللي هاتكتبيه متاح طول الوقت ويكون عليه واتس)

- العنوان: (من غير تفاصيل زيادة – يعني بلاش فوق المحل الفلاني الدور التاني لأنه مش هاييجي يزوركم)

- الإيميل: (استخدمي ايميل رسمي فيه اسمك واسم العيلة من غير اسماء مستعارة – يعني بلاش sarsora_daloo3a@gmail.com لأنها بتدي انطباع مش لذيذ)

2. مقدمة:

ودي عبارة عن 3 جمل بتقولي فيهم أنت بتعملي إيه وعايزة إيه زي مثلا

(أصمم رسومات هندسية لمدة 3 سنين واشارك في العمل التطوعي مع جمعيات خيرية عديدة وأتطلع إلى وظيفة توفر لي التحدي والراتب المناسبين)

3. بيانات الوظائف والخبرات السابقة:

بتكتبي فيها كل خبراتك الوظيفية من الأحدث إلى الأقدم، وسجليها بالترتيب ده

اسم الشركة – وظيفتك فيها – مهام وظيفتك – تاريخ شغل الوظيفة وتاريخ تركها

وممكن كمان في الجزء ده تكتبي الوظائف اللي شغلتيها حتى لو بشكل خيري غير مدفوع الأجر، لأن الجزء ده هدفه يبين أنت لفيتي وشفتي قد إيه

4. بيانات الدورات والمؤتمرات:

حتى لو كانت غير معتمدة أو أونلاين أو بدون شهادة أو بدون امتحانات أو حتى لو بانت لك غير مهمة سجليها لأن جايز يكون صاحب العمل عايز المهارة دي. وكمان الجزء ده بيوضح قد إيه أنت طموحة وبتدوري إنك تبني نفسك وتكبري وتتطوري. ممكن تكتبيها بالترتيب ده

الدورة – موضوعها – تاريخها

5. بيانات الهوايات:

جانب مهم جدا تذكريه، لأنه بيوضح شخصيتك من زاوية تانية

ومهم جدا تكوني صادقة فيه، لأن جايز صاحب العمل يسألك عن تفاصيل فيه

ومهم جدا تستخدميه بذكاء، فلو كنتب تحبي الرسم والتصوير مثلا وبتقدمي لشركة جرافيك ديزاين لازم تظهري الجانب ده

6. بيانات الأشخاص المرجعيين:

وهنا تكتبي بيانات الأشخاص اللي يعرفوكي على المستوى العملي وممكن يرجع صاحب العمل يسألهم عنك، وطبعا تكوني متأكدة إنهم هايتكلموا عنك كويس ومافيش مانع لو أديتيهم فكرة

بعض الملاحظات العامة في كتابة السيرة الذاتية:

- اكتبي الـCV بتاعك بنفسك بلاش تاخدي CV حد تاني وتعدلي فيه

- خلي بالك من الأخطاء الإملائية والقواعد اللغوية

- اكتبي كل قسم على حدة وخلي فيه فاصل مسافة بين كل قسم والتاني

- ما تحطيش صور في السيرة الذاتية ولا حتى صورتك

- استخدمي نوع خط واحد واضح رسمي وغير مزخرف

- خلي حجم الخط مناسب (من 11 ل 13)

- ممكن تستخدمي في الكتابة لون تاني مع الاسود

- اتأكدي من أن شكل الـCV متنسق بشكل مريح للعين

- احفظي الملف باسمك بصيغة PDF

إذا حبيتي فيه موقع مجاني وممتاز، يعمل لك CV احترافي وهو:

https://flowcv.io

وأخيرا، إذا احتاجتي أي مساعدة احنا جنبك

اشجعك تكتبي لنا عن المشاكل اللي بتواجهك في شغلك واحنا نساعدك

وبالتوفيق

لو عندك أي سؤال اكتبيه في الكومنتات وها نرد عليكي في أقرب فرصة

لو عايزة تعرفي عن موضوع معين اكتبي لنا في الكومنتات

لو استفدتي وحاسة إن الموضوع ده هايفيد ناس تانية تعرفيهم اعملي share وخلي اهتمامك بيهم يوصل لهم

#Vitatreat