وقتك حياتك

إزيك؟

زي ما قلت لك قبل كدة في التدوينة دي: (ليه تعرفي أكتر؟)

"المدونة دي، مكان مخصوص ليكي، معمول عشانك وعشان كل واحدة بتشتغل. المكان ده كل همه في الحياة إنك تعرفي أكتر، فتبقي حرة أكتر. حرة في قراراتك، حرة في اختياراتك، حرة في حياتك، حرة في طريقتك.

عشان كدة هتلاقي في المدونة مواضيع كمان تساعدك في شغلك، زي إدارة الوقت والعمل الجماعي ومهارات تانية كتيرة - لأن المعرفة حرية"

عشان كدة، وعشان يهمنا جدا نجاحك في كل مكان أنت فيه، هانكون وراكي دايما في كل موقف.

ربنا وهب البنات امكانية جبارة من ضمن المميزات اللي بتمتاز بيها عن الرجالة، وهي إن عقلها يقدر يتعامل مع كذا موضوع بشكل متوازي في نفس الوقت، لكن الرجالة مش بيعرفوا يعملوا كدة، الراجل يركز في موضوع واحد ولما يخلص يبدأ في اللي بعده.

والميزة دي مهمة جدا، وبتساعد البنت في إنها تقدر تعمل كذا حاجة في نفس الوقت زي مثلا إنها تعتني بحبايبها كل واحد بقصته، في الوقت اللي بتكون فيه مركزة في شغلها بتفاصيله ومتطلباته. عشان كدة أنت مميزة جدا وعندك المحور الرئيسي اللي يخليكي (ملكة إدارة الوقت).

عشان كدة، هانبدأ النهاردة في تعلم مهارة مهمة جدا في كل مواقف حياتنا وهي مهارة (إدارة الوقت)، جاهزة؟ . . ياللا بينا

أولا: إيه هو الوقت؟

ببساطة الوقت هو حياتك، حتى لو كان ده بيغيب عن تفكيرنا ساعات، لكن لو فكرتي فيها هاتعرفي إن كل وقت بيعدي عليكي هو جزء من حياتك. كام مرة تحسي إن اليوم خلص من غير ما تعملي حاجات كنت عايزة تعمليها؟ . . كام مرة بتيجي في آخر يومك تقولي لنفسك: "أنا مش عارفة اليوم ده عدى أزاي بسرعة كدة؟" . . كام مرة بتفوقي لنفسك وتقولي: "ياااااااه أنا بقيت ... سنة؟" . . بس للأسف اللي بيعدي من الوقت ده مش بنعرف نعوضه تاني . . إذا الوقت شيء مهم وغالي جدا ومحتاج يتنظم وناخد بالنا هو بيروح في إيه.

ثانيا: يعني إيه إدارة الوقت؟

إدارة الوقت هي إدارة لنفسك . . فأنت بتحاولي تفرضي سيطرتك على الوقت وتروضيه وتستفيدي من الوقت الضايع في حاجات تافهة. أنت عارفة، لو وفرتي من وقتك 30 دقيقة بس كل يوم بتقضيها في حاجات غير مفيدة، كأن بقى عندك شهر زيادة كل سنة تقدري تعملي فيه كل اللي مش لاحقة تعمليه.

ثالثا: إيه الحاجات اللي بتضيع وقتك؟

حاجات كتير وكل واحدة أدرى بيومها ووقتها وبتقضيه في إيه زي:

1. عدم إدراك قيمة الوقت

2. عدم ترتيب الأولويات

3. تأجيل الأمور المهمة

4. ظروفك أو ظروف الأسرة أو العمل أو المجتمع

5. النوم لفترات طويلة فوق الطبيعي

لكن هنا لازم ناخد بالنا من نقطة إنك عشان تعرفي إيه الحاجات اللي بتضيعي فيها وقتك محتاجة الأول ترتبي اولوياتك لأن نفس الحاجة اللي بتعمليها ممكن تكون مهمة وممكن تكون مضيعة وقت . . يعني مثلا واحدة بتتفرج على مسرحية كوميدي، هل دي مضيعة وقت؟

1. لو كانت سايبة ولادها مثلا جعانين وعايزين يتغدوا وقاعدة تتفرج عليها تبقى أكيد مضيعة للوقت

2. لو كانت مش وراها التزامات ومضغوطة في مواضيع خاصة وبتحاول مثلا تغير مودها فأكيد ده استغلال للوقت

كمان نومك عن احتياج للنوم، شيء ضروري . . لكن نومك 12 ساعة في اليوم، شيء مضر

اللي عايز أقوله إن فيه جزء من حياتنا بنحب نعمل فيه حاجات ممكن تبان تافهة لتخفيف الضغوط، وده شيء مفيد نفسيا فلا يعتبر مضيعة للوقت . . الموضوع ده محتاج منك تمييز وأمانة مع نفسك

رابعا: ليه إدارة الوقت مهمة؟

لأنك لما تتعلمي إزاي تتحكمي في يومك، هتلاقي فيه وقت كتير اتوفر عندك تقدري تعملي فيه حاجات كتير كان نفسك تعمليها زي مثلا:

1. تهتمي بنفسك وشعرك وبشرتك

2. تطوري من نفسك في مجال عملك وفي المجالات اللي بتحبيها

3. تنمي موهبتك المركونة من سنين عشان مافيش وقت

4. تقضي وقت اكبر مع باللي بتحبيهم (أطفالك – زوجك – أهلك – أصحابك)

5. كمان هتلاقي وقت تسافري وتعملي أنشطة ماكنش ليها وقت

خامسا: إزاي تديري وقتك بفعالية؟

وزي ما قلت في الأول إنت (ملكة إدارة الوقت)، لكن دي شوية Tips عملية ومفيدة هاتساعدك بشكل فعال وسريع:

1. خدي موضوع إدارة وقتك بجدية وحزم: ودي أهم نقطة وأول نقطة ,اكتر نقطة فعلا هاتفرق معاكي، لأن طبيعي جدا لو ما ألزمتيش نفسك بالخطوات دي مش هاتوصلي لأي شيء جديد ولا هاتحسي بفرق.

2. جهزي لنفسك دايما خطة يومية مكتوبة: فيها الحاجات اللي عايزة تعمليها النهاردة، الأهم فالمهم. وده هايخليكي مركزة أكتر ومش تايهة. وماتعتمديش على إنك عارفة الحاجات دي في دماغك لأن زي ما الكاتب دافيد ألين قال في كتاب (Getting things done): "عقلك هو أداة لصنع الافكار وليس لحفظها"

3. اعتمدي على اللي حواليكي: لأن الطلبات كتير والتفاصيل أكتر، بلاش تتقمصي شخصية Super woman وتصري إنك تعملي كل حاجة بنفسك. لكن حاولي توزعي المهام على اللي حواليكي، خصوصا لما تكون مش محتاجة تعمليها بشكل شخصي. ممكن توزعي مهام شغل على موظفين تحت إيدك، ممكن تخلي جوزك أو أخوكي أو صاحبك يقضوا لك مشوار، ممكن تطلبي الخضار والفاكهة دليفري بدل ما تنزلي تنقيهم بنفسك. كل ده هايوفر معاكي وقت لانجاز مهام تانية ماحدش ينفع يقوم بيها غيرك.

4. اهتمي بنظام المكان اللي عينك بتقع عليه: سواء غرفتك أو مكتبك أو دولابك أو مكتبتك أو مطبخك، لأن ترتيب المكان يعكس نظام تفكيرك وينعكس على نظام إدارتك للوقت ويخليكي شايفة كل حاجة بشكل أوضح فتقدري تركزي على الحاجات المهمة في حياتك.

5. قولي (لا) للأشياء المفاجئة غير الهامة: نقطة ممكن تبان إنها سخيفة شوية، لكن تخيلي معايا كدة عندك امتحان بكرة وواحدة صاحبتك اتصلت بيكي بتقول لك تعالي ننزل نخرج شوية، إيه رأيك؟ . . أكيد هاتعتذري وهاتفضلي مركزة في مراجعة المادة اللي امتحانها بكرة . . نفس الكلام في كل مواقف حياتك، اتعرض عليكي حاجة معينة، فكري فيها هل هي أولوية من أولوياتك؟ هل هي لازم تتعمل حالا؟ وانت تحكمي وتميزي صح . . لأن وقتك مش هايساع إنه يكون مجال لتنفيذ خطط الأخرين . . وما تخافيش على زعلهم لما ترفضي، لأن اللي بيحبوكي ها يحبوا مصلحتك فهايقدّروا ويعذروكي.

6. اهتمي بفتات الوقت: خدي بالك إن فيه وقت كتير بيروح في الانتظار؛ طول اليوم بتستني حاجات كتير؛ محل يفتح – اجتماع يخلص – مواصلة تيجي – أكل يستوي – ابنك يرجع من المدرسة – أوردر يوصل – ييجي دورك في كشف عند دكتور . . وغيرهم. كل الفتافيت من اوقات الانتظارات دي تقدري تعملي فيهم حرفيا المعجزات: تقدري تقري كتاب – تبعتي ميل – تردي على عملاء – تتابعى اهتمامتك – تنامي – تطلبي حاجة اونلاين – تسألي على حد ما شفتيهوش من مدة . . وغيرهم.

على قد ما النقط دي تبان بسيطة، لكنها فعلا فعالة بشكل لا يُصدَّق وعن تجربة ناس كتيرة، غيرت حياتهم وخليتهم يعرفوا ينجزوا حاجات كتير جدا في يومهم، وبقى عندهم وقت كمان زيادة لنفسهم ولحبايبهم

ومرة أخيرة، مش معنى إدارة وقتك بشكل صحيح، إني تيجي على صحتك أو نومك أو نفسيتك. ولكن تقضي كمية الوقت المناسب للحاجة اللي بتعمليها حسب اهميتها بالنسبة لك. وإذا حبيتي تعرفي عن الموضوع ده بشكل أكتر وتقري عنه أكتر، ابعتي لينا على الواتس، هانبعت لك قائمة بأفضل الكتب عن موضوع إدارة الوقت.

هدية مجانية:

دلوقتي تقدري تطلبي To Do List مع أي أوردر من فيتاتريت، هايوصلك ببلاش، عشان نساعدك إنك تديري وقتك بشكل أفضل

وخلصت الحدوتة

لو عندك أي سؤال اكتبيه في الكومنتات وها نرد عليكي في أقرب فرصة

لو عايزة تعرفي عن موضوع معين اكتبي لنا في الكومنتات

لو استفدتي وحاسة إن الموضوع ده هايفيد ناس تانية تعرفيهم اعملي share وخلي اهتمامك بيهم يوصل لهم

#Vitatreat